Казан үзәгендә, Мәскәү урамында, Татарстан башкаласының иң борынгы һәм иң танылган спорт объектларының берсе – Спорт сарае урнашкан.
Бу 1966 елда төзелгән бина күп еллар дәвамында республиканың төп боз аренасы һәм «Ак Барс» хоккей клубы өчен йорт булды. Проект авторы-архитектор М.Х. Агишев. Үзенең озын тарихында бина берничә тапкыр реконструкция кичергән. Яңартуның беренче этабы 1998 елда узды - ул вакытта фойелар киңәйтелде, матбугат үзәге, спорт музее һәм комментатор кабиналары барлыкка килде. 2000 елда комплекска икенче боз шугалагы бинасын төзегәннәр. Вакытлар узу белән инфраструктура искерде, һәм бүген объект яңадан җитди капиталь ремонтка мохтаҗ.
Кызыклы фактлар һәм әһәмиятле вакыйгалар
Спорт сарае һәрвакыт Казанның спорт мәйданчыгы гына түгел, мәдәни мәйданчыгы да булды. Биредә танылган артистлар, шул исәптән Владимир Высоцкий концертлары узган, ә Татарстанда иң популяр Яңа ел чыршысы шулай ук озак еллар нәкъ менә монда оештырылган.
Нәкъ менә монда 1997 / 1998 еллар сезонында команда беренче тапкыр Россия чемпионатының алтын медальләрен яулады. Бу аренада фигуралы шуу буенча дөнья һәм Европа чемпионнары балкып торды, ә Сарай диварларында СССРның 17 спорт мастерын тәрбияләгән мәктәп эшләде.
Төрле елларда биредә Континенталь хоккей лигасының даими чемпионаты матчлары узды, I Киберспорт TNA фестивале, WorldSkills Russia VII Милли чемпионатын ачу тантанасы, ә 2023 елда – «Россия-Ислам дөньясы» икътисадый форумы кысаларында Ислам дөньясының җыелма командасы уйнады.
Нәрсә эшләнәчәк?
ТР Дәүләт экспертизасында кабатлау экспертиза узган проект документациясендә бинаны капиталь ремонтлау каралган. Эшләр конструкцияләрне һәм инженер системаларны комплекслы яңартуны үз эченә алачак. Төп юнәлешләр арасында:
-
гомуми төзелеш эшләре;
-
түбәне ремонтлау;
-
вентиляция һәм кондиционерлау системаларын яңарту;
-
янгынга каршы су белән тәэмин итүне яңарту;
-
суыткыч җайланмаларын алыштыру;
-
боз кырын суык белән тәэмин итү системасын яңарту;
-
суыткыч җайланмасы һәм вентиляция буенча эшләтеп җибәрү-көйләү эшләре.
Заказчы-төзүче: «Татарстан Республикасы Баш төзелеше» дәүләт бюджет учреждениесе.
Мөрәҗәгать итүче: «Спорт Сарае» дәүләт бюджет учреждениесе.
Спорт сараен капиталь ремонтлау - бинаны яңарту гына түгел, ә Казанның спорт тарихының мөһим йөзен саклау һәм спортчыларның киләчәк буыннары өчен заманча мәйданчык булдыру.
